Wilgedraai Voortrekkerkamp

Wilgedraai Voortrekkerkamp word hierdie jaar vir die 31ste keer aangebied op die goue strande van die Vaaldam. Ons bied elke Verkenner, Staatmaker en Offisier die geleentheid om bietjie te kom ontspan, voor die laaste kwartaal van 2018.

Die De Bank Voortrekkerkampterrein, op die oewer van die Vaaldam, bied ongelooflike sonsopkomste, waar die goud oor die spieëlgladde oppervlak van die dam gestrooi lê en in die aande sak die son in al die asemrowende skakerings van ‘n troupand. Hier staan jy oopmond en vergaap jouself aan die kunswerk van God se verfkwas.

Wilgedraai is ’n avontuurbelaaide kamp, waar almal pret op en langs die waters van die Vaaldam het. Of jy nou roei in ‘n kajak, speel op ‘n katamaran, lui lekker lê op die dek van ‘n groter seiljag, in ‘n motorboot rond jaag op die dam, vlugbal op die strand speel of die eerste sonbrand van die seisoen opdoen… hierdie is beslis die vakansiekamp vir jou! As jy die volgende Bear Grylls is en of jy net ’n bietjie wil kom ontspan en saam met jou vriende kuier, by Wilgedraai Waterwerkkamp sal jy vir jouself ’n plekkie vind.

Tydens Wilgedraai word daar verskeie gespesialiseerde kursusse aangebied soos Varswaterkunde, Roeikunde, Varswaterhengel, Seilkuns, Ruiterkuns, Kampmedia, Seilvernuf, Motorbootkunde en die ”ultimate” Selfbehoud. Al Wilgedraai se kursusse word aangebied deur ’n span jong dinamiese instrukteurs, wat deskundiges is op hul onderskeie gebiede. Daar word gefokus op die ontwikkeling van hierdie varswatervaardighede maar meer as dit, die ontwikkeling van die verkenner se persoonlike passie – want niks groots is al ooit bereik sonder passie nie…

Wilgedraai is die plek waar jy kan kom ontspan saam met ou vriende en waar jy nuwes maak. Hier kan jy jouself wees!

Wilgedraai Waterwerkkamp: Waar jy jouself mag wees!